Yeni evlər üçün 10 milyon manat ayrıldı
Qarabağ müharibəsi əlilləri və şəhid ailələri üçün mənzillərin alınması məqsədilə 2018-ci ilin dövlət büdcəsindən Əmək və Əhalinin Sosial Müdafiəsi Nazirliyinə 10 milyon manatı ayrılıb. Sərəncamı prezident İlham Əliyev imzalayıb.
Sənəddə qeyd olunur ki, son illər Qarabağ müharibəsi əlilləri və şəhid ailələrinin sosial müdafiəsinin daha da gücləndirilməsi, o cümlədən bu qəbildən olan insanların sağlamlıq, reabilitasiya və yaşayış şəraitlərinin yaxşılaşdırılması üçün mühüm tədbirlər həyata keçirilib: “1997-2017-ci illər ərzində dövlət Qarabağ müharibəsi əlilləri və şəhid ailələrinə 6000-dən çox mənzil verib”.
Novator.az-ın məlumatına görə, martın 13-də Dövlət Sosial Müdafiə Fondunun kollegiya iclasında çıxış edən əmək və əhalinin sosial müdafiəsi naziri Səlim Müslümov deyib ki, 2017-ci ildə Qarabağ müharibəsi əlillərinin və şəhid ailələrinin mənzillə təminatı proqramı çərçivəsində 315 nəfərə mənzillər təqdim edilib, bununla da indiyədək nazirliyin xətti ilə mənzillə təmin edilən əlil və şəhid ailələrinin sayı 6,1 minə çatdırılıb.
