ABŞ-ın yeni dövlət katibi
Novator.az ABŞ-ın yeni dövlət katibi (xarici işlər naziri) Mayk Pompeonu təqdim edir.
Martın 13-də ABŞ prezidenti Donald Tramp Reks Tillersonu dövlət katibi vəzifəsindən azad edərək bu posta Mərkəzi Kəşfiyyat İdarəsinin direktoru Mayk Pompeonu gətirib. Mərkəzi Kəşfiyyat İdarəsinə rəhbərlik isə Cina Haspelə həvalə olunub. Hər iki təyinat Senatda təsdiqlənməlidir.
Mayk Pompeo 1963-cü ildə Orinc şəhərində (Kaliforniya ştatı) doğulub. 1986-cı ildə Uest-Poynt Hərbi Akademiyasını bitirib. 1991-ci ilə qədər ABŞ Silahlı Qüvvələrində xidmət edib.
Hərbi xidmətdən sonra Mayk Pompeo Harvard Universitetinin hüquq fakültəsində təhsil alıb, uzun illər hüquq firmalarında və biznes qurumlarında çalışıb.
2011-2017-ci illərdə Mayk Pompeo Konqresdə Kanzas ştatını təmsil edib. 2017-ci ilin yanvarından Mərkəzi Kəşfiyyat İdarəsinin direktoru olub.
Evlidir, bir oğlu var.
Reks Tillerson dövlət katibi postuna 2017-ci ilin yanvarında təyin olunmuşdu. 65 yaşlı Reks Tillerson Texas Universitetini bitirib, mühəndisdir.
1975-ci ildən “Exxon Mobil” neft şirkətində çalışan Reks Tillerson 1990-cı illərin sonunda qurumun Rusiyadakı layihələrinin rəhbəri olub. 2006-cı ildən “Exxon Mobil” şirkətinin baş direktoru postunu tutub.
