Son artımlar əhalinin üçdə birini əhatə edib
2018-ci il yanvarın 1-dən 1 milyon 256 min nəfərin pensiyası, 400 min nəfərə yönələn ünvanlı sosial yardım, martın 1-dən isə 621 min nəfərə müxtəlif növ müavinətlər, 846 min nəfərin əmək haqları artırılıb. Artımlar ümumilikdə 3 milyon 123 min nəfəri və ya ölkə əhalisinin 31,55 faizini əhatə edir. Sosial ödənişlər üzrə artımların təmin edilməsi üçün il ərzində 600 milyon manat əlavə vəsait ayrılması nəzərdə tutulur.
Bunları əmək və əhalinin sosial müdafiəsi naziri Səlim Müslümov Dövlət Sosial Müdafiə Fondunun kollegiya iclasında deyib.
Rəsmi məlumata görə, nazir qeyd edib ki, 2017-ci ildə Qarabağ müharibəsi əlillərinin və şəhid ailələrinin mənzillə təminatı proqramı çərçivəsində 315 nəfərə mənzillər təqdim edilib, bununla da indiyədək nazirliyin xətti ilə mənzillə təmin edilən əlil və şəhid ailələrinin sayı 6,1 minə çatdırılıb.
Müslümov ötən il pensiyanın orta aylıq məbləğinin 8,4 faiz artaraq 1 yanvar 2018-ci ilə 208,4 manata, o cümlədən yaşa görə pensiyaların orta aylıq məbləğinin 9,3 faiz artaraq 233,61 manata çatdığını vurğulayıb.
1 yanvar 2018-ci ilə ölkədə 1 milyon 318 min 446 nəfər əmək pensiyası alıb.
Hesabata görə, 2017-ci ildə Dövlət Sosial Müdafiə Fondunun gəlirləri 2016-cı ilə nisbətən 6,98 faiz artaraq 3,4 milyard manata yüksəlib. Məcburi dövlət sosial sığorta haqları üzrə daxilolmalar 8,72 faiz artıb.
