Ömürlüyün yolu necə açıldı?
Çin Xalq Nümayəndələri Yığıncağının (parlament) 11 mart iclasında ölkə konstitusiyası redaktə edilib. Əsas yenilik dövlət başçısı – Çin Xalq Respublikasının sədri vəzifəsinə seçki qaydasının dəyişməsidir. Ana qanunun əvvəlki variantında eyni şəxsin iki müddətə (hər biri 5 il olmaqla) dövlət başçısı seçilməsi nəzərdə tutulurdu. 11 mart iclasında bu məhdudiyyət götürülüb. 2958 deputat yeniliyin lehinə, 2 deputat əleyhinə səs verib, 3 nəfər bitərəf qalıb.
Novator.az bildirir ki, hazırda Çin Xalq Respublikasının sədri postunu 1953-cü il təvəllüdlü Si Cinpin tutur. O, 2012-ci ilin noyabrında Çin Kommunist Partiyasının baş katibi, 2013-cü ilin martında Çin Xalq Respublikasının sədri seçilib.
Ötən ilin oktyabrında Si Cinpin yenidən Kommunist Partiyasının baş katibi olub. Çin Xalq Respublikasının sədrini seçmək isə Xalq Nümayəndələri Yığıncağının səlahiyyətindədir.
