Müayinələr bitmək üzrədir
Ankaradakı Hacettepe Universitetinin xəstəxanasında müalicə olunan Milli Strateji Düşüncə Mərkəzinin sədri İsa Qəmbərin xanımı Aida Qəmbər martın 12-də Novator.az saytına açıqlama verib. O bildirib ki, həyat yoldaşının durumu yaxşıdır və müayinələr bitmək üzrədir: “İsa bəy yaxın günlərdə Bakıya qayıdacaq və birbaşa evə gələcək. Həkimlər onun Bakıda yenidən müayinə olunmasına lüzum görmürlər”.
İsa Qəmbər bu il iki dəfə (13-18 yanvar, 23-28 fevral) Bakıdakı Mərkəzi Klinik Xəstəxanada ürəyindən müalicə alıb. Fevralın 28-də o, müalicəsini davam etdirmək üçün Türkiyə paytaxtına gedib.
İsa Qəmbər 1957-ci il fevralın 24-də Bakı şəhərində doğulub. Bakı Dövlət Universitetinin tarix fakültəsini bitirib. 1979-1989-cu illərdə Milli Elmlər Akademiyasında elmi işçi vəzifəsində çalışıb.
Siyasətə 1980-ci illərin ikinci yarısında qoşulan İsa Qəmbər milli azadlıq hərəkatının liderlərindən biridir. 1990-1995-ci illərdə parlamentin deputatı, 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib.
1992-2014-cü illərdə Müsavat Partiyasının başqanı postunu tutub.
