Bakı görüşündə deyilənlər
Prezident İlham Əliyev martın 12-də Azərbaycana rəsmi səfər edən Gürcüstanın baş naziri Georgi Kvirikaşvili ilə görüşüb. AZƏRTAC-ın məlumatına görə, İlham Əliyev deyib ki, iki ölkə bir çox sahədə uğurlu əməkdaşlıq edir: “Şadam ki, ticarət dövriyyəsi artır. Şadam ki, Azərbaycan Gürcüstana sərmayə qoyan ölkələrin arasında birinci yeri tutur. 2012-ci ildən biz bu birinciliyi saxlayırıq. Bu onu göstərir ki, ölkənizdə çox gözəl sərmayə iqlimi var. Eyni zamanda onu göstərir ki, bizim əlaqələrimiz çox yüksək səviyyədədir.
Əlbəttə, bizi birləşdirən bir çox önəmli qlobal layihələr var. Biz keçən ilin oktyabr ayında sizinlə bərabər onlardan birinin açılışını qeyd etdik – Bakı-Tbilisi-Qars. Bu il Cənubi Qafqaz qaz kəmərinin, TANAP layihəsinin istifadəyə verilməsi nəticəsində əməkdaşlığımız daha da yüksək pilləyə qalxacaq. Yəni bizim əməkdaşlığımız regional formatdan çıxıb qlobal müstəviyə qalxır. Bütün bu uğurlu addımların təməlində bizim dostluğumuzdur, qardaşlığımızdır. Əminəm ki, həmin münasibətlər bundan sonra da xalqlarımızın maraqlarına xidmət edəcək”.
Georgi Kvirikaşvili qeyd edib ki, Azərbaycan Gürcüstanın strateji tərəfdaşıdır: “Sevindirici haldır ki, bizim iqtisadi əlaqələrimiz yüksələn xətt üzrə inkişaf edir. Keçən il ikitərəfli münasibətlər xüsusi inkişafla yadda qaldı.
Azərbaycan Gürcüstan üçün birinci investisiya tərəfdaşıdır. Bu yaxınlarda dərc olunan statistik məlumatlara görə, səfərlərin sayına görə də Azərbaycan Respublikası Gürcüstan üçün birinci yerdədir.
Bakı-Tbilisi-Qars dəmir yolu, Cənub Qaz Dəhlizi layihələri çox mühüm əhəmiyyətə malikdir. Azərbaycan qazı Cənub Qaz Dəhlizi layihəsinin seqmentləri olan Trans-Anadolu və Trans-Adriatik kəmərləri ilə sonradan Avropaya nəql ediləcək. Bu layihələr iqtisadi və geosiyasi baxımdan çox mühümdür.
Regional formatlarda əməkdaşlığımız çox vacibdir. Həm siyasi məsləhətləşmələr, həm də qlobal formatda əməkdaşlığımız mövcuddur. Gürcüstan hər zaman Azərbaycanın mövqeyini dəstəkləyir. Bu, bizim strateji əlaqələrimizin göstəricisidir”.
Görüşdən sonra Georgi Kvirikaşvilinin şərəfinə rəsmi nahar verilib.
