Gənclər Fondunun yeni statusu
Prezident yanında Gənclər Fondunun əsasında Gənclər Fondu publik hüquqi şəxs yaradılıb. Dövlət başçısı İlham Əliyevin fərmanı ilə fondun nizamnaməsi təsdiq edilib.
Fondun nizamnamə fondu 115 min manatdır və dövlət büdcəsi vəsaiti hesabına formalaşdırılır. Qurumun 9 nəfər üzvdən ibarət Müşahidə Şurası yaradılır. Şuranın üzvlərinin vəzifəyə təyin və vəzifədən azad edilməsi, habelə onların səlahiyyətlərinə vaxtından əvvəl xitam verilməsi prezidentin səlahiyyətindədir.
Fondun fəaliyyətinə prezident sərəncamı ilə təyin olunan icraçı direktor rəhbərlik edir.
Nizamnaməsinə görə, qurumun fəaliyyətinin əsas məqsədi gənclər siyasəti ilə bağlı elm, təhsil, mədəniyyət və digər sosial sahələrə yönəlmiş ictimai və sosial əhəmiyyətli, o cümlədən beynəlxalq səviyyədə həyata keçirilən layihə və proqramları qrant şəklində məqsədli maliyyələşdirməkdən, həmin sahədə konfrans, seminar, festival, olimpiada və digər tədbirlərin təşkilindən, habelə gənclərə maliyyə köməyi nəzərdə tutan layihələri dəstəkləməkdən ibarətdir.
