Üçüncü festival elan olundu
Bakıda üçüncü dəfə təşkil olunacaq ticarət festivalının tarixi açıqlanıb. Azərbaycan Konqreslər Bürosu festivalın mayın 1-dən 31-dək keçiriləcəyini bəyan edib. Açıqlamaya görə, festivalda Bakıda yerləşən 800-ə yaxın mağaza qatılacaq.
Ticarət festivalları dövründə fiziki şəxslərin Azərbaycanda aldığı, istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisi qaytarılır. İl boyu əlavə dəyər vergisinin qaytarılmasını tənzimləyən “Tax Free” sistemi də tətbiq olunur.
İlk ticarət festivalı ötən il aprelin 10-dan mayın 10-dək, ikincisi oktyabrın 15-dən noyabrın 15-dək keçirilib.
Azərbaycan Konqreslər Bürosu bildirir ki, üçüncü festivalda yerli və xarici vətəndaşlar endirimlərdən faydalana, “Baku Shopping Festival – Tax Free” nişanı olan mağazalardan etdikləri hər 100 manatdan çox alış-veriş zamanı əlavə dəyər vergisinin müəyyən qismini geri ala bilər. Həmin məbləği nağd və bank hesabına – karta köçürmə yolu ilə əldə etmək mümkündür.
