Mitinqə razılıq verildi
Bakı Şəhər İcra Hakimiyyəti müxalifətin martın 10-na planlaşdırdığı mitinqlə bağlı müraciətə cavab verib.
Novator.az-ın məlumatına görə, meriya mitinqin keçirilməsinə razılaşıb.
Mitinqin əsas təşkilatçıları Demokratik Qüvvələrin Milli Şurası və Müsavat Partiyasıdır. Daha bir neçə müxalif qurum aksiyaya qoşulacağını bəyan edib.
Mitinq saat 15-dən 17-dək paytaxtın Yasamal rayonundakı İdman-Sağlamlıq Kompleksinin stadionunda (“İnşaatçılar” metro stansiyasının yanı) olacaq. Aksiyada siyasi və sosial tələblər qoymaq, prezident seçkisinin oktyabrdan aprelə irəli çəkilməsinə etiraz bildirmək nəzərdə tutulur.
Müraciət Bakı Şəhər İcra Hakimiyyətinə bu şəxslərin imzası ilə göndərilmişdi: Milli Şuranın Koordinasiya Mərkəzinin üzvləri İbrahim İbrahimli və Eldəniz Quliyev, Müsavat Partiyası başqanının müavini Fərəc Kərimli, Azərbaycan Xalq Cəbhəsi Partiyası Ali Məclisinin sədri Nurəddin Məmmədli.
