Mitinq hazırlıqları, problemlər
Demokratik Qüvvələrin Milli Şurası və Müsavat Partiyası başda olmaqla bir neçə müxalif qurum paytaxtın Yasamal rayonundakı İdman-Sağlamlıq Kompleksinin stadionunda (“İnşaatçılar” metro stansiyasının yanı) mitinqə hazırlaşır. Aksiyada siyasi və sosial tələblər qoymaq, prezident seçkisinin oktyabrdan aprelə irəli çəkilməsinə etiraz bildirmək nəzərdə tutulur.
Martın 10-na təyin olunan aksiyaya şərait yaratması üçün Bakı Şəhər İcra Hakimiyyətinə müraciəti Milli Şuranın Koordinasiya Mərkəzinin üzvləri İbrahim İbrahimli və Eldəniz Quliyev, Müsavat başqanının müavini Fərəc Kərimli, Azərbaycan Xalq Cəbhəsi Partiyası Ali Məclisinin sədri Nurəddin Məmmədli imzalayıblar.
Fərəc Kərimli martın 7-də Novator.az-a deyib ki, partiya üzvlərinə təzyiqlər var: “Martın 6-da 50-dən artıq müsavatçı müxtəlif polis bölmələrinə çağırılıb. Onlar dindirilərək sərbəst buraxılıblar. Bu gün isə Bakı Şəhər Baş Polis İdarəsinin əməkdaşları Müsavatın mərkəzi qərargahına gələrək başqan müavini Gülağa Aslanlını heç bir əsas göstərmədən aparıblar. Bütün bu addımlar müxalifətin martın 10-na təyin etdiyi birgə ümumxalq mitinqi ilə bağlıdır”.
Fərəc Kərimli bildirib ki, Bakı Şəhər İcra Hakimiyyəti mitinq müraciətinə hələ rəsmi cavab verməyib: “Dünən cavab verilməli idi. Qanun mitinqə üç iş günü qalmışa qədər cavab verilməsini tələb edir”.
Partiya başqanının müavini qeyd edib ki, 10 mart mitinqinə Müsavat və Milli Şura üzvləri ilə yanaşı digər təşkilatların nümayəndələrinin qatılacağını gözləyirlər: “Hələlik “Nida” Vətəndaş Hərəkatı rəsmi bəyanat yayaraq mitinqə qoşulacağını bildirib. Sosial şəbəkələrdə gedən müzakirələrdən görünür ki, ictimaiyyətin müxalifətin birgə mitinq qərarına münasibəti müsbətdir. Hazırlıq yüksək səviyyədə gedir və inanıram ki, bu, müxalifətin son illərdə keçirdiyi ən kütləvi mitinq olacaq”.
Milli Şuranın Koordinasiya Mərkəzinin üzvü Vahid Məhərrəmli Novator.az-a bildirib ki, mitinqə hazırlıq qaydasında gedir: “Hər şeyə hazırıq, Bakı Şəhər İcra Hakimiyyətindən aksiya müraciətinə rəsmi cavab gözləyirik. Mitinqimizə başqa qüvvələrin qoşulmasını, qələbəlik gözləyirik. Müxtəlif partiyaların, ictimai-siyasi təşkilatların təmsilçiləri əvvəllər Milli Şuranın mitinqlərində iştirak ediblər, yenə də aksiyaya gələcəklər”.
