İşğalçıların üçüncü yolu
Azərbaycanın işğal olunmuş ərazisindən Ermənistana üçüncü yolun çəkilişinə hazırlıq başlayıb. Novator.az-ın məlumatına görə, işğalçı Dağlıq Qarabağ rejiminin “Şəhərsalma Nazirliyi” martın 7-də bəyan edib ki, Kəlbəcər şəhərindən Ermənistanın Qeqarkunik vilayətinin Sotk kəndinə (Zod kəndi) 26 kilometr uzunluğunda yeni yol çəkmək nəzərdə tutulur. Tikinti işlərini 2018-ci ilin axırına başa çatdırmaq planlaşdırılır.
Laçından keçən, Xankəndini Ermənistanın Gorus şəhəri ilə birləşdirən ilk yol 1999-cu ilin noyabr ayında istifadəyə verilib.
İkinci yolun açılışı 2017-ci ilin sentyabrında olub. Kəlbəcərdən keçən həmin yol Ermənistanın Vardenis rayonunu keçmiş Ağdərə rayonu ilə birləşdirir.
1988-ci ilin fevralından başlayaraq Ermənistan Azərbaycanın Dağlıq Qarabağ vilayətini (Xankəndi şəhərini, Şuşa, Xocalı rayonlarını tam, Xocavənd rayonunu, keçmiş Ağdərə rayonunu qismən) və onun ətrafındakı bölgələri (Laçın, Kəlbəcər, Qubadlı, Zəngilan rayonlarını tam, Ağdam, Füzuli, Cəbrayıl rayonlarını qismən), eləcə də Qazax rayonunun 7, Naxçıvan Muxtar Respublikasının 1 kəndini işğal edib. 1994-cü ildə elan olunan atəşkəsdən bəri sülh danışıqları heç bir nəticə vermir.
