İş Avropaya gedir
Ali Məhkəmə martın 6-da AXCP üzvü Fuad Əhmədlinin şikayətinə baxıb.
Fuad Əhmədli 2016-cı il avqustun 18-də tutulub. O, operator işlədiyi “Azerfon” şirkətində abonentin şəxsi məlumatlarını başqasına ötürməkdə ittiham olunub. Bakı Ağır Cinayətlər Məhkəməsi Fuad Əhmədlini əməliyyat-axtarış fəaliyyəti qanunvericiliyini pozma və vəzifə səlahiyyətlərindən sui-istifadədə təqsirli bilərək 4 il müddətinə azadlıqdan məhrum edib, apellyasiya instansiyası cəzanı qüvvədə saxlayıb.
Azadliq.org-un məlumatına görə, Ali Məhkəmə də eyni qərar çıxarıb. Fuad Əhmədli 6 mart prosesində iştirak etməyib. Vəkil Əsabəli Mustafayev çıxışında cinayət işinin qondarma olduğunu deyib, Fuad Əhmədliyə bəraət istəyib, ancaq Ali Məhkəmə 4 illik cəzanı dəyişməyib.
Məhbusun atası Zəfər Əhmədli “Azadlıq” radiosuna deyib ki, Ali Məhkəmənin qərarını alandan sonra Avropa İnsan Hüquqları Məhkəməsinə şikayət veriləcək: “Fuadın həbs olunması qərarından şikayət xeyli vaxtdır Avropa Məhkəməsinin icraatındadır. Hökmdən şikayəti də yaxın vaxtlarda göndərəcəyik”.
