İlqar Məmmədovun mitinq rəyi necə olub?
Demokratik Qüvvələrin Milli Şurası fevralın 27-də Müsavat Partiyasına və REAL Hərəkatına birgə mitinqlər keçirmək təklifi ilə müraciət edib. Müsavat təklifə müsbət cavab verib. İlk birgə mitinqi Yasamal rayonundakı İdman-Sağlamlıq Kompleksinin stadionunda (“İnşaatçılar” metro stansiyasının yanı) keçirmək planlaşdırılır. Martın 10-na təyin olunan aksiyaya şərait yaratması üçün Bakı Şəhər İcra Hakimiyyətinə müraciət edilib. Mitinqin sosial tələblər, “Monarxiyaya son”, “Siyasi məhbuslara azadlıq”, “Korrupsiyaya son” kimi şüarlar altında keçirilməsi nəzərdə tutulur.
REAL Hərəkatı Milli Şuranın təşkil etdiyi mitinqlərdə qurum olaraq, təşkilatçılardan biri kimi iştirak etməmək, üzvləri aksiya məsələsində sərbəst buraxmaq qərarı verib.
2008-ci ildə yaradılmış REAL Hərəkatı partiyaya çevrilməyə hazırlaşır. Qurumun sədri İlqar Məmmədov həbsdədir, Bakıdakı 2 saylı Cəzaçəkmə Müəssisəsində saxlanır.
Respublikaçı Alternativ Partiyasının Təşkilat Komitəsinin üzvü Azər Qasımlı Novator.az-a deyib ki, mitinqlərlə bağlı qərar sədr İlqar Məmmədovun rəyindən sonra verilib: “İlqar Məmmədovun rəyi belə oldu ki, bu məsələlər haqqında daha çox məlumat bizdədir. Təşkilat Komitəsinin tam doğru qərar verəcəyinə güvəndiyini və çıxaracağı qərarı dəstəkləyəcəyini bildirdi. Yəni bu məsələdə yekun qərar birbaşa öhdəmizə buraxıldı”.
