Dövlət komitəsinin torpaq hesabatı
Əmlak Məsələləri Dövlət Komitəsinin hesabatına görə, 50 rayon üzrə səmərəsiz istifadə olunan 255 min hektara yaxın kənd təsərrüfatı təyinatlı torpaqlar geri qaytarılaraq təkrar istifadəyə verilib. 2017-ci ildə kənd təsərrüfatı sahəsində əkin dövriyyəsinin artırılması məqsədilə 177 min hektara yaxın torpaq sahəsinin hüquqi və fiziki şəxslərə icarəyə verildiyi bildirilir.
Hesabata əsasən, 152 min hektar torpağın təyinatı kənd təsərrüfatı məqsədilə dəyişdirilib: “Həmin ərazi 28 aqropark və 13 iri təsərrüfatın yaradılmasına imkan verib. Torpaqlardan təyinatına uyğun və səmərəli istifadə istiqamətində nəzarət tədbirləri gücləndirilir. Aparılan monitorinqlər nəticəsində 2500-ə yaxın hal üzrə inzibati protokollar tərtib edilib. 8 min hektara yaxın kənd təsərrüfatı təyinatlı torpaq sahələrində 26 minə yaxın kateqoriyasına uyğun olmayan tiklilərin inşa olunduğu üzə çıxıb.
Xəzər dənizinin sahilboyu 20-50 metrlik hissəsində olan torpaq sahələrindən istifadə vəziyyəti ilə bağlı 44 hal üzrə inzibati tənbeh tədbirləri tətbiq olunub, 15 hal üzrə sənədlər hüquq mühafizə orqanlarına göndərilib”.
