Prezidentə namizədlik vəsiqəsi təqdim olundu
Mərkəzi Seçki Komissiyasının sədri Məzahir Pənahov martın 5-də dövlət başçısı İlham Əliyevə prezidentliyə namizədlik vəsiqəsi təqdim edib.
Hakim Yeni Azərbaycan Partiyasının irəli sürdüyü prezident İlham Əliyevin namizədliyi fevralın 27-də qeydə alınıb. MSK namizədliyin müdafiəsi üçün 40 mindən az olmayan seçici imzasının toplanmasını əsas götürüb.
Fevralın 5-də dövlət başçısı İlham Əliyev 2018-ci il oktyabrın 17-də keçirilməli olan prezident seçkisini aprelin 11-nə irəli çəkib. 11 aprel seçkisinə daha 14 nəfər qatılıb. İlham Əliyev namizədliyi rəsmiləşən yeganə iddiaçıdır.
Novator.az bildirir ki, 56 yaşlı İlham Əliyev 1994-cü ildən 2003-cü ilin avqust ayınadək Azərbaycan Dövlət Neft Şirkətinin vitse-prezidenti və birinci vitse-prezidenti olub. 1995-ci və 2000-ci illərdə Milli Məclisin deputatı seçilib. 2003-cü ildə baş nazir vəzifəsinə təyin edilib. Həmin ilin oktyabr ayından Azərbaycanın prezidentidir.
