Enerjiyə məsul quruma kimlər haqq ödəyəcək?
Prezident İlham Əliyev dörd qanunda yenilikləri imzalayıb. Qüvvəyə minən yeniliklərə görə, enerji istehsalçıları, ötürücülər, paylayıcılar və təchizatçılar; enerji istehsalçıları və enerji təchizatı müəssisələri; qaz istehsalçıları, təchizatçıları və paylayıcılar; elektrik və istilik enerjisi istehsalçıları Enerji Məsələlərini Tənzimləmə Agentliyinə haqq ödəyir.
Novator.az xatırladır ki, ötən ilin dekabrında Energetika Nazirliyinin tabeliyində Enerji Məsələlərini Tənzimləmə Agentliyi yaradılmasına fərman verilib. Sənəd Energetika Nazirliyinin Dövlət Enerji Nəzarəti İdarəsi və Dövlət Qaz Nəzarəti İdarəsi, habelə onların yerli bölmələrinin ləğvini nəzərdə tutub.
Enerji Məsələlərini Tənzimləmə Agentliyi Azərbaycanda elektrik və istilik enerjisi, habelə qaz təchizatı sahələrində istehsalçılar, ötürücülər, paylayıcılar, təchizatçılar və istehlakçılar arasında münasibətlərin tənzimlənməsini, müəssisələrin fəaliyyətinin təhlilini, restrukturizasiya tədbirləri ilə bağlı təkliflər verilməsini, investisiyaların cəlb edilməsi üçün stimullaşdırıcı mexanizmlər hazırlanmasını, mühəndis-kommunikasiya təminatı sistemlərinə və xidmətlərin keyfiyyətinə dair tələblərə əməl edilməsinə nəzarətin təşkilini həyata keçirən publik hüquqi şəxsdir.
Qurumu İdarə Heyəti idarə edir. İdarə Heyətinin tərkibi energetika nazirinin vəzifəyə təyin və vəzifədən azad etdiyi sədrdən və onun iki müavinindən ibarətdir. Bu ilin yanvarında Samir Axundov İdarə Heyətinin sədri təyin edilib.
