Daha iki qrupun maaşı artdı
Daha iki büdcə qrupunun maaşları dəyişib. Novator.az-ın məlumatına görə, dövlət büdcəsindən maliyyələşdirilən səhiyyə müəssisələrində və sosial təminat müəssisələrində çalışan işçilərin Vahid Tarif Cədvəli ilə müəyyən edilmiş aylıq vəzifə (tarif) maaşları martın 1-dən orta hesabla 10 faiz artırılır. Sərəncamları prezident İlham Əliyev imzalayıb.
Daha əvvəl təhsil müəssisələrində (ali təhsil müəssisələri istisna olmaqla) çalışan işçilərin aylıq vəzifə maaşları orta hesabla 10 faiz çoxaldılıb. Təhsil Nazirliyi artımın orta hesabla 240 minədək təhsil işçisinə şamil edildiyini açıqlayıb.
Orta hesabla 10 faizlik artım dövlət büdcəsindən maliyyələşdirilən elmi müəssisə və təşkilatlarda çalışan işçilərin Vahid Tarif Cədvəli ilə müəyyən edilmiş aylıq vəzifə (tarif) maaşlarına da şamil olunub.
