Dağınıq sklerozla mübarizə proqramı
Dövlət başçısı İlham Əliyev dağınıq skleroz xəstəliyinin müalicəsi, profilaktikası və onunla mübarizə tədbirləri proqramını təsdiq edib. 2018-2022-ci illər üçün dövlət proqramında nəzərdə tutulan tədbirlərin həyata keçirilməsini əlaqələndirmək Səhiyyə Nazirliyinə tapşırılıb.
Novator.az-ın məlumatına görə, sənəddə qeyd olunur ki, dağınıq skleroz baş və onurğa beyninin sinir liflərinin mielin örtüyünün zədələnməsi ilə müşayiət olunan xroniki autoimmun xəstəlikdir: “Bu xəstəliyə ən çox 18-45 yaşlı insanlarda rast gəlinir, lakin bütün yaş qruplarında dağınıq skleroza təsadüf edilə bilər. Dünya Səhiyyə Təşkilatının məlumatına əsasən, nevroloji xəstəliklər arasında dağınıq skleroz cavan yaşda əlilliyin əsas səbəblərindən biridir. Bu xəstəliyə tutulmuş şəxslər xəstəliyin başlanmasından 10-15 il sonra sərbəst hərəkət etmək imkanından məhrum olurlar.
Statistik məlumatlara əsasən, hazırda dünya üzrə dağınıq sklerozdan əziyyət çəkən xəstələrin sayı 2 milyona yaxındır. Azərbaycanda belə xəstələrin sayı 1000 nəfərə yaxındır və xəstələnmə halları ilbəil artmağa meyllidir. İl ərzində hər 100 min nəfər əhaliyə 3-4 xəstələnmə hadisəsi qeydə alınır”.
Dövlət proqramının əsas vəzifələri belə sıralanır: dağınıq skleroz xəstəliyinin diaqnostikasının və müalicəsinin yaxşılaşdırılması; dağınıq skleroz xəstəliyinin ağırlaşmalarının qarşısının alınması; dağınıq skleroz xəstəliyi ilə bağlı əlilliyin və ölüm hallarının azaldılması; xəstələrin spesifik dərman preparatları ilə davamlı təminatı; dağınıq skleroz xəstəliyinə düçar olmuş şəxslərin bərpa müalicəsinin təşkili.
İcra üçün tələb olunan xərclərin maliyyələşdirilməsi dövlət büdcəsinin mərkəzləşdirilmiş xərclərində “Səhiyyə” bölməsi üzrə nəzərdə tutulmuş vəsait dairəsində həyata keçiriləcək.
