Bakının orta maaşı artıb, sərmayəsi azalıb
2017-ci ildə paytaxtda işçilərin orta aylıq nominal əməkhaqqı 6,1 faiz artaraq 785,8 manat olub. Novator.az-ın məlumatına görə, Bakı Şəhər Statistika İdarəsi belə hesabat yayıb.
Rəsmi hesabata əsasən, 2018-ci ilin yanvar ayında sənayedə istehsalın və xidmətlərin həcmi əvvəlki ilin müvafiq ayı ilə müqayisədə 0,7 faiz artaraq 3,4 milyard manat təşkil edib. Sənaye məhsulunun 86,3 faizi mədən sektorunda istehsal olunub. Qeyri-dövlət sektorunun payı 83,9 faiz göstərilir.
Qeyd olunur ki, 2018-ci ilin yanvar ayında əhaliyə göstərilən ödənişli xidmətlərin dəyəri 2017-ci ilin müvafiq dövrü ilə müqayisədə 0,8 faiz, ticarət dövriyyəsinin həcmi 3 faiz, iaşə dövriyyəsi real ifadədə 4 faiz artıb.
2018-ci ilin yanvar ayında şəhərin iqtisadi və sosial sahələrinin inkişafı üçün əsas kapitala 653,4 milyon manat və ya əvvəlki ilin müvafiq dövrü ilə müqayisədə 33,4 faiz az vəsait yönəldilib. Ümumi sərmayənin 26,7 faizi dövlət, 73,3 faizi qeyri-dövlət sektorunun sərmayədarlarının payına düşüb.
