Prezident yeni obyektlərə baş çəkib
Fevralın 27-də prezident İlham Əliyev Mingəçevir Sənaye Parkında “Mingəçevir Tekstil” MMC-nin iplik istehsalı üzrə iki müəssisəsinin açılışında iştirak edib.
14,5 hektar sahədə yaradılmış, ümumi dəyəri 144 milyon manat olan fabriklər Almaniya, İsveçrə, İspaniya və Yaponiyanın aparıcı şirkətlərinin avadanlığı ilə təchiz edilib.
Yeni fabriklərlə tanışlıqdan sonra dövlət başçısı müəssisələrin işçiləri və şəhər ictimaiyyətinin nümayəndələri ilə görüşüb.
AZƏRTAC xəbər verir ki, İlham Əliyev Mingəçevirdə “ASAN Həyat” kompleksinin açılışına da qatılıb.
Mingəçevir “ASAN Həyat” kompleksi Vətəndaşlara Xidmət və Sosial İnnovasiyalar üzrə Dövlət Agentliyinin sayca 13-cü mərkəzidir. Kompleks üçmərtəbəli inzibati binadan və üç ictimai iaşə obyektindən ibarətdir.
“ASAN xidmət” mərkəzində Ədliyyə, Daxili İşlər, Vergilər, İqtisadiyyat, Əmək və Əhalinin Sosial Müdafiəsi nazirlikləri, Əmlak Məsələləri Dövlət Komitəsi, Dövlət Gömrük Komitəsi, Dövlət Miqrasiya Xidməti, Səfərbərlik və Hərbi Xidmətə Çağırış üzrə Dövlət Xidməti və Milli Arxiv İdarəsi vətəndaşlara 32 növ xidmət göstərəcək. Eyni zamanda mərkəzdə 112 növ funksional yardımçı xidmətlər, o cümlədən bank, sığorta, hüquqi yardım, tərcümə və digər xidmətlər təşkil ediləcək. Mərkəz Mingəçevir, Yevlax və Ağdaşda qeydiyyatda olan 337 min 767 vətəndaşa xidmət göstərəcək.
Həmin gün prezident Mingəçevir şəhərinin elektrik paylayıcı şəbəkəsinin Avtomatik İdarəetmə və Nəzarət Mərkəzinin açılışında iştirak edib.
İlham Əliyevin iştirakı ilə Mingəçevir-Bəhramtəpə avtomobil yolunun əsaslı şəkildə yenidən qurulan 26 kilometrlik Aran-Qarağacı hissəsi də açılıb.
