İsa Qəmbər müayinə üçün Türkiyəyə gedəcək
Milli Strateji Düşüncə Mərkəzinin sədri İsa Qəmbər tibbi müayinə üçün Türkiyəyə gedəcək. Bunu Bastainfo.com-a Müsavat Partiyasının başqanı Arif Hacılı deyib.
İsa Qəmbər yanvarın 13-dən 18-dək Bakıdakı Mərkəzi Klinik Xəstəxanada ürəyindən müalicə alıb, sonra müalicəsini evdə davam etdirib. Fevralın 23-dən o, yenidən Mərkəzi Klinik Xəstəxanada müayinə olunur.
Arif Hacılı Bastainfo.com-a bildirib: “İsa bəy özünü yaxşı hiss edir və yəqin ki, bu gün Mərkəzi Klinik Xəstəxanadan çıxacaq. Dostlarımız təklif edib ki, daha keyfiyyətli tibbi müayinədən keçməsi üçün İsa bəyin Türkiyəyə getməsi yaxşı olar. Bu təklifləri nəzərə alaraq İsa bəylə Türkiyəyə gedəcəyik. Orada həm dostlarımız və müttəfiqimizlə görüşlərimiz olacaq, həm də İsa bəy daha keyfiyyətli tibbi müayinədən keçəcək”.
İsa Qəmbər 1988-1991-ci illərdə milli azadlıq hərəkatının liderlərindən biri, 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib. 1992-2014-cü illərdə Müsavat Partiyasının başqanı postunu tutub.
