Faiq Əmirli bəraət ala bilmədi
Fevralın 27-də Ali Məhkəmə AXCP sədrinin köməkçisi, “Azadlıq” qəzetinin maliyyə direktoru Faiq Əmirlinin kassasiya şikayətinə baxıb. APA-nın məlumatına görə, prosesdə çıxış edən Faiq Əmirli və vəkili Aqil Layıcov bəraət istəyiblər. Dövlət ittihamçısı isə şikayətin təmin olunmasına qarşı çıxıb. Hakim şikayəti təmin etməyib.
2016-cı il avqustun 20-də tutulan Faiq Əmirli ötən il iyulun 24-də Səbail Rayon Məhkəməsinin hökmü ilə 3 il 3 ay müddətinə azadlıqdan məhrum edilib. O, xeyli miqdarda vergidən yayınmada və qulluq mövqeyindən istifadə etməklə milli, irqi, sosial və ya dini nifrət, düşmənçiliyin salınmasında təqsirli bilinib. Faiq Əmirliyə qarşı Vergilər Nazirliyinin mülki iddiası da təmin olunub, Səbail Rayon Məhkəməsinin qərarında onun dövlətə 39 min manat ödəməli olduğu qeyd edilib.
2017-ci il sentyabrın 15-i Bakı Apellyasiya Məhkəməsi Faiq Əmirlinin cəzasının qalan hissəsini şərti cəza ilə əvəzləyib və həbsdən buraxılmasına qərar verib.
