AXCP üzvü həbs olunub
AXCP üzvü, Astara rayon sakini Tofiq Məmmədov inzibati həbs cəzası alıb.
Yasamal Rayon Məhkəməsi onu ictimai qaydanı pozmaqda və polisə müqavimət göstərməkdə təqsirli bilərək 15 sutka müddətinə azadlıqdan məhrum edib.
“Azadlıq” radiosu xəbər verir ki, bir neçə gün öncə sosial şəbəkələrdə Tofiq Məmmədovun polis əməkdaşlarından şikayəti yayılmışdı. O bildirirdi ki, metro çıxışlarında limon satmaqla ailəsini dolandırmağa çalışır, polislər isə buna imkan vermir, zorakılıq edirlər: “Mənə deyirlər ki, get, nə istəyirsən elə, lap narkotik sat, amma limon satma, küçə ticarəti qadağandır”.
Fevralın 22-də Tofiq Məmmədov “Kanal-13” internet televiziyasına bildirmişdi ki, polislərlə bağlı şikayətindən sonra təzyiqlərlə üzləşib: “Ailədə 8 nəfər mənim əlimə baxır. Bir limonun satışından mənə 3 qəpik qalır. Əgər deyildiyi kimi, Azərbaycanda milyonlarla iş yeri açılsaydı, mən əlimdə limon satardımmı? Mənə iş versinlər, heç “İnşaatçılar”a ayaq basmaram”.
Tofiq Məmmədov “Kanal-13”dəki müsahibəsi yayılandan bir gün sonra – fevralın 23-də həbs olunub.
AXCP Tofiq Məmmədovun Yasamal Rayon Polis İdarəsinin əməkdaşlarından şikayətinə görə cəzalandırıldığını iddia edir. Partiyanın mətbuat xidmətindən bildirilib ki, Tofiq Məmmədov polis əməkdaşlarının, idarə rəisinin sürücüsünün ona qarşı özbaşınalığını ictimailəşdirdiyi üçün cəzalandırılıb.
Tofiq Məmmədov 2017-ci il oktyabrın 7-də Milli Şuranın paytaxtda keçirdiyi mitinqdə iştirakından sonra saxlanmış, ona 200 manat cərimə cəzası kəsilmişdi. Bundan bir neçə gün sonra atası Oruc Məmmədova 10 sutka inzibati həbs cəzası verilmişdi. O zaman Tofiq Məmmədov deyirdi ki, müxalifətin aksiyalarında iştirakına görə onun atasını cəzalandırırlar: “Atam 2012-ci ildən YAP-ın üzvüdür. Milli Şuranın mitinqlərində mənim iştirakıma görə özümü cərimələməklə kifayətlənməyib, atamı da saxlayıblar”.
