Ərdoğana zəng
Prezidentin mətbuat xidmətinin məlumatına görə, dövlət başçısı İlham Əliyev fevralın 26-da türkiyəli həmkarı Rəcəb Teyyub Ərdoğana zəng edib. İlham Əliyev Rəcəb Teyyub Ərdoğana ad günü münasibətilə təbriklərini çatdırıb, prezidentlik fəaliyyətində uğurlar və cansağlığı arzulayıb.
Prezidentə minnətdarlığını bildirən Türkiyə lideri Xocalı soyqırımını bir daha pisləyib, bu faciə ilə bağlı başsağlığı verib.
İlham Əliyev və Rəcəb Teyyub Ərdoğan iki ölkə arasında əlaqələrin bütün sahələrdə gələcəkdə də uğurla inkişaf edəcəyinə əminliklərini bildiriblər.
Novator.az bildirir ki, fevralın 26-da Rəcəb Teyyub Ərdoğanın 64 yaşı tamam olur.
1954-cü ildə İstanbulda doğulan Rəcəb Teyyub Ərdoğan siyasətlə 1976-cı ildən məşğuldur. Milli Salamat, Rifah, Fəzilət partiyalarının üzvü olub. 1994-1998-ci illərdə İstanbul bələdiyyəsinin başçısı postunu tutub. 1999-cu ildə həbsdə yatıb.
2001-ci ildə Ədalət və İnkişaf Partiyasını yaradıb. Rəcəb Teyyub Ərdoğan 2003-cü ildən 2014-cü ilədək baş nazir olub. 2014-cü ildən prezidentdir.
