Qidanın depressiyaya nə təsiri var?
Amerikalı alimlər depressiyanı aşmaq üçün sadə üsul tapıblar. Novator az-ın məlumatına görə, mütəxəssislər müəyyən edib ki, təzə meyvə-tərəvəz və taxıl məhsulları ilə qidalanmaq psixi gərginliyi azaldır. Alimlər yaşlılar üzərində 6 illik eksperiment aparandan sonra bu qənaətə gəliblər.
Eksperiment iştirakçıları qida səviyyəsinə uyğun üç hissəyə bölünüb: hipertoniya xəstəliyinə qarşı pəhrizli qida qəbul edənlər, Aralıq dənizi pəhrizi və ənənəvi Qərb pəhrizi ilə qidalananlar.
Müşahidələr göstərib ki, meyvə-tərəvəz və yağsız məhsullarla qidalanan qrupun nümayəndələrində depressiya riski daha az olub.
Ən yüksək depressiya göstəricisi qırmızı ətin istifadə olunduğu Qərb pəhrizi üzrə qidalanan qrupda müşahidə edilib.
Alimlər vurğulayır ki, əldə etdikləri nəticə hipertoniya xəstəliyinə qarşı istifadə olunan pəhrizli qidanın psixi xəstəlik riskini azaltdığını sübut etmir, yalnız bunlar arasında müəyyən əlaqənin olduğunu göstərir.
Səidə Hüseynova
