Ermənistanın “Avroviziya” təmsilçisi seçildi
Bu ilin mayında Portuqaliyanın paytaxtı Lissabonda keçiriləcək “Avroviziya” mahnı müsabiqəsində Ermənistanı təmsil edəsi müğənninin adı açıqlanıb. Novator.az-ın məlumatına görə, Ermənistan İctimai Televiziyasının final müsabiqəsində Sevak Xanaqyan qalib gəlib. Xanaqyan tamaşaçılar və münsiflər heyətinin 50/50-yə səsvermə prinsipi ilə seçilib.
30 yaşlı müğənni Lissabonda “Külək” adlı mahnını ifa edəcək.
Ermənistan təmsilçisinin çıxışı ilk yarımfinalda, mayın 8-də baş tutacaq.
Xanaqyan erməni dilində mahnıların ifaçısı və müəllifidir. O, bir sıra beynəlxalq televiziya mahnı müsabiqəsində iştirak edib.
“Avroviziya” mahnı müsabiqəsinə qatılan ölkələrdən bir çoxunun da təmsilçisi bəllidir. Albaniyadan Yevqent Buşpepa, Almaniyadan Mixael Şulte, Avstraliyadan Cessika Mauboy, Avstriyadan Sezar Sempson, Azərbaycandan Aysel Məmmədova, Belarusdan Nikita Alekseyev, Belçikadan Laura Qruseneken, Böyük Britaniyadan Suzanna Mariya Kork, Çexiyadan Nikolas Cozef, Danimarkadan Conas Rasmussen, Finlandiyadan Saara Aalto, Fransadan Madam Bonsior, Gürcüstandan “İriao” qrupu, Xorvatiyadan Franka Bateliç, Niderlanddan Ueylon (Villem Beykerk), İrlandiyadan Rayan O’Şonessi, İspaniyadan Alfred Qarsiya və Amaya Romero, İsraildən Netta Barzilay, İsveçrədən “Zibbz” qrupu, İtaliyadan Ermal Meta və Fabrisio Moro, Kiprdən Eleni Fureyra, Makedoniyadan Eye Cue, Maltadan Kristabell Borq, Monteneqrodan Vanya Radovanoviç, Rusiyadan Yuliya Samoylova, Serbiyadan Sanya İliç və “Balkanika” qrupu, Yunanıstandan Yanna Terzi seçilib.
1-ci yarımfinalda (8 may) Albaniya, Avstriya, Azərbaycan, Belarus, Belçika, Bolqarıstan, Çexiya, Ermənistan, Estoniya, Finlandiya, Xorvatiya, İrlandiya, İslandiya, İsrail, İsveçrə, Kipr, Litva, Makedoniya, Yunanıstan mübarizə aparacaq.
2-ci yarımfinalda (10 may) Avstraliya, Danimarka, Gürcüstan, İsveç, Latviya, Macarıstan, Malta, Moldova, Monteneqro, Niderland, Norveç, Polşa, Rumıniya, Rusiya, San Marino, Serbiya, Sloveniya, Ukrayna təmsilçiləri çıxış edəcək.
Hər yarımfinaldan 10 iştirakçı finala (12 may) adlayacaq. Ev sahibi Portuqaliya ilə yanaşı Almaniya, Böyük Britaniya, Fransa, İspaniya, İtaliya finala birbaşa vəsiqə alıblar.
