Baş nazir 83 yaşa çatdı
Fevralın 26-da Azərbaycanın baş naziri Artur Rasizadənin 83 yaşı tamam olur.
Novator.az bildirir ki, 1935-ci ildə Gəncədə anadan olan Artur Rasizadə 1957-ci ildə Azərbaycan Sənaye İnstitutunu (indiki Neft və Sənaye Universiteti) bitirib. 1973-cü ilədək Azərbaycan Neft-Maşınqayırma İnstitutunun mühəndisi, şöbə müdiri, elmi işlər üzrə direktor müavini vəzifələrində çalışıb.
1973-1977-ci illərdə İttifaq Neft-Maşınqayırma Birliyi rəisinin birinci müavini, 1977-1978-ci illərdə Azərbaycan Neft-Maşınqayırma İnstitutunun direktoru olub.
1978-1981-ci illərdə Dövlət Plan Komitəsinin sədr müavini, 1981-1986-cı illərdə Azərbaycan KP MK-da maşınqayırma şöbəsinin müdiri vəzifələrində çalışıb.
1986-1992-ci illərdə baş nazirin birinci müavini postunu tutub. 1992-1996-cı illərdə İqtisadi İslahatlar Fondunda məsləhətçi olub.
1996-cı ildə Azərbaycan Respublikası prezidentinin köməkçisi vəzifəsinə təyinat alıb. Həmin il noyabrın 26-dan baş nazirdir (2003-cü ilin avqustundan noyabrınadək olan dövrü çıxmaq şərti ilə, həmin dövrdə o, baş nazirin birinci müavini işləyib).
Azərbaycan Konstitusiyasına görə, Nazirlər Kabinetinin tərkibinə baş nazir, onun müavinləri, nazirlər və başqa mərkəzi icra hakimiyyəti orqanlarının rəhbərləri daxildir. Baş naziri Milli Məclisin razılığı ilə prezident təyin edir.
