Avropa Parlamentində ilk dəfə: Xocalı bəyanatı qəbul edilib
Avropa Parlamentində yeni yaradılmış Azərbaycanın Dostları Klubunun üzvləri Xocalı soyqırımının 26-cı ildönümü ilə bağlı bəyanat qəbul ediblər. Bəyanatı 13 ölkəni (Latviya, Rumıniya, İspaniya, Çexiya, Finlandiya, Sloveniya, İtaliya, Belçika, Slovakiya, Estoniya, Bolqarıstan, Avstriya, Litva) təmsil edən deputatlar, o cümlədən qurumun vitse-prezidenti imzalayıb.
Milli Məclisin mətbuat xidməti bildirir ki, bəyanatın qəbul edilməsi ilə bağlı təşəbbüsü Avropa Parlamentinin Latviyadan olan deputatı, Azərbaycanın Dostları Klubunun həmsədri Andrey Mamikins irəli sürüb. Bəyanat Avropa Parlamenti çərçivəsində Xocalı qətliamı ilə bağlı qəbul edilmiş ilk sənəddir.
Sənəddə Azərbaycan xalqının 1992-ci il fevralın 25-dən 26-na keçən gecə Xocalıda törədilmiş amansız cinayətlə üzləşməsi, nəticədə 613 mülki şəxsin, o cümlədən 106 qadının, 63 uşağın və 70 qocanın həyatını itirməsi, yüzlərlə insanın ağır yaralanması və 1275 nəfərin girov götürülməsi faktı öz əksini tapıb.
Avropa Parlamentinin üzvləri Xocalı qətliamı nəticəsində həyatını itirənlərin yaxınlarına başsağlığı verdiklərini, ailələrinin dərdlərinə şərik olduqlarını bildirir və Xocalı faciəsi kimi insanlıq əleyhinə yönəlmiş cinayətlərin bir daha baş verməməsi üçün Xocalı qətliamının xatırlanmalı olduğunu vurğulayırlar.
