Son artımlar
Prezidentin fərdi təqaüdünün məbləği 2018-ci il martın 1-dən artırılaraq 1450 manat müəyyən edilir. Fevralın 22-də imzalanmış fərmanda artım ölkənin elm, təhsil, mədəniyyət, iqtisadiyyat, dövlət idarəçiliyi və digər sahələrdə böyük əməyi olan şəxslərin xidmətlərinin qiymətləndirilməsi və onların sosial müdafiəsinin daha da gücləndirilməsi zərurəti ilə əsaslandırılıb.
Hazırda prezidentin fərdi təqaüdü 1300 manatdır.
Novator.az-ın məlumatına görə, prezident İlham Əliyev artımları nəzərdə tutan iki sərəncam da imzalayıb. Martın 1-dən xalq fəxri adı üçün aylıq təqaüdü məbləği 150 manat olur.
Əməkdar fəxri adı daşıyanlar 100 manat aylıq təqaüd alacaqlar.
İndi xalq yazıçısı, xalq şairi, xalq artisti və xalq rəssamı fəxri adlarına görə aylıq təqaüdün məbləği üçün 100 manatdır. Əməkdar elm xadimi, əməkdar incəsənət xadimi, əməkdar artist, əməkdar rəssam, əməkdar mədəniyyət işçisi, əməkdar müəllim, əməkdar həkim, əməkdar memar, əməkdar bədən tərbiyəsi və idman xadimi, əməkdar dövlət qulluqçusu, əməkdar jurnalist, əməkdar mühəndis, əməkdar hüquqşünas, əməkdar kənd təsərrüfatı işçisi, əməkdar pilot, əməkdar tibb işçisi üçün 60 manat təqaüd müəyyən edilib.
Gənc istedadlar üçün xüsusi aylıq təqaüdün məbləği isə martın 1-dən artırılaraq 300 manatdan 400 manata çatdırılır.
