Sahibkarlara yeni kreditlər verildi
İqtisadiyyat Nazirliyinin Sahibkarlığa Kömək Milli Fondu Qax rayonunda işgüzar forum keçirib. Forumda Şəki-Zaqatala iqtisadi rayonunda fəaliyyət göstərən sahibkarlara 1 milyon manatdan çox güzəştli kredit verilib. Kreditlərin əsasən aqroparkın yaradılmasına, heyvandarlıq və s. sahələrin inkişafına yönəldiləcəyi, bu layihələr çərçivəsində 100-ə yaxın yeni iş yerinin açılacağı qeyd olunub.
Fevralın 23-də yayılan rəsmi məlumata görə, forumda bildirilib ki, bu il sahibkarlıq subyektlərinin investisiya layihələrinin maliyyələşdirilməsinə 19 milyon manat güzəştli kredit ayrılıb. Bu kreditlərdən istifadə etməklə investisiya layihələrinin reallaşdırılması 1000-dən çox yeni iş yerinin yaradılmasına imkan verir.
Ümumilikdə indiyədək Şəki-Zaqatala iqtisadi rayonunda fəaliyyət göstərən sahibkarlıq subyektlərinin 2300-dək investisiya layihəsinin maliyyələşdirilməsinə 102,9 milyon manat güzəştli kredit verildiyi bəyan edilib.
