Qapanan və açılan iş yerlərinin hesabatı yayılıb
2017-ci ildə 47,6 min iş yeri bağlanıb. Bağlanmış iş yerlərinin 81,6 faizi qeyri-dövlət sektorunun payına düşüb. İş yerlərinin 70,1 faizi fərdi sahibkarlıq subyektlərinin, 12,1 faizi müəssisə və təşkilatların fəaliyyəti dayandırması, 17,8 faizi isə ixtisarlarla əlaqədar qapanıb. Dövlət Statistika Komitəsi belə hesabat yayıb.
Novator.az bildirir ki, hesabata görə, 2017-ci ildə ölkədə 281,4 min yeni, o cümlədən 179,3 min daimi iş yeri açılıb. Yaradılmış iş yerlərinin 61 faizi qeyri-dövlət sektorunun payına düşüb.
Yeni iş yerlərinin 24,4 faizinin Bakı şəhərində, 0,9 faizinin Naxçıvan Muxtar Respublikasında, 74,7 faizinin regionlarda açıldığı bildirilir.
Daimi iş yerlərinin 10,3 faizini yeni yaradılmış müəssisə və təşkilatlar, 14,3 faizini mövcud müəssisə və təşkilatlar, 1,2 faizini fəaliyyətini bərpa etmiş müəssisə və təşkilatlar, 74,2 faizi fərdi sahibkarlıq subyektləri yaradıb.
