Yeni yaşayış kompleksinə köç başlayıb
Tərtər rayonunda məcburi köçkün ailələri 1176 ailəlik yeni yaşayış kompleksinə köçürülür. Xəbəri fevralın 22-də AZƏRTAC yayıb.
Mənzillər məcburi köçkün ailələrə püşkatma yolu ilə, ailə üzvlərinin sayına uyğun olaraq verilir. Yaşayış məhəlləsinə Tərtər rayonu ərazisindəki sosial obyektlərdə – məktəblərdə, uşaq bağçalarında, inzibati binalarda və digər tikililərdə məskunlaşan məcburi köçkünlər köçürülür. Artıq iki gün ərzində 120 ailə yeni mənzillərə köçürülüb.
Məcburi köçkünlərin əşyaları Qaçqınların və Məcburi Köçkünlərin İşləri üzrə Dövlət Komitəsinin ayırdığı yük maşınları tərəfindən yeni mənzillərə daşınır.
Yaşayış məhəlləsində hər biri 4 mərtəbəli olmaqla 34 yaşayış binası, 1200 şagird yerlik məktəb binası, 280 yerlik uşaq bağçası, musiqi məktəbi, həkim məntəqəsi, inzibati bina, klub icma mərkəzi, avtomat telefon stansiyası inşa edilib. Binalardakı mənzillərin 120-si bir, 504-ü iki, 472-si üç, 80-ni dördotaqlıdır.
