Korrupsiya Qavrama İndeksi: Azərbaycan 180 ölkə arasında 122-cidir
“Transparency İnternational” təşkilatının milli bölməsi olan “Şəffaflıq Azərbaycan” Korrupsiyaya Qarşı Mübarizə İctimai Birliyi 2017-ci il üçün Korrupsiya Qavrama İndeksini (KQİ) təqdim edib.
Hesabata görə, Azərbaycan KQİ-də 31 balla 180 ölkə arasında 122-ci sırada yer alır.
Reytinq 0-100 ballıq qiymətləndirmə əsasında hazırlanıb. 0 bal olduqca yüksək korrupsiyalaşma səviyyəsini göstərir.
2016-ci ildə Azərbaycan 30 balla 176 ölkə sırasında 123-ci yeri tutmuşdu.
2017-ci il indeksinin hazırlanmasında ümumilikdə 13 fərqli hesabatdan istifadə edilib. Bu hesabatlar antikorrupsiya siyasətinin səmərəliliyinə təsir göstərən bir sıra siyasi, iqtisadi və sosial xarakterli meyarlar üzrə ölkələrin mövqeyini qiymətləndirir. Azərbaycana dair məlumat 7 fərqli mənbə əsasında hazırlanıb.
Novator.az bildirir ki, Korrupsiya Qavrama İndeksində Gürcüstan 46-cı, Türkiyə 81-ci, Ermənistan 107-ci, İran 130-cu, Rusiya 135-ci yerdədir.
