1/8 final yarılandı
UEFA Çempionlar Liqasının 1/8 finalında ilk oyunlar arxada qalıb. Novator.az-ın məlumatına görə, fevralın 21-də keçirilən “Sevilya” (İspaniya) – “Mançester Yunayted” (İngiltərə) görüşü qolsuz bitib.
“Şaxtyor” (Ukrayna) – “Roma” (İtaliya) matçında isə meydan sahibləri 2:1 hesabı ilə üstün gəliblər.
Srağagün Türkiyənin “Beşiktaş” komandası Münhendə “Bavariya”nın qonağı olub, matç alman klubunun 5:0 hesablı qələbəsi ilə başa çatıb. “Çelsi” (İngiltərə) – “Barselona” (İspaniya) görüşündə qalib müəyyən olunmayıb – 1:1.
Ötən həftə Portuqaliya səfərində “Portu” ilə üz-üzə gələn “Liverpul” (İngiltərə) meydan sahibini 5, İsveçrədə “Bazel”in qonağı olan “Mançester Siti” (İngiltərə) rəqibini 4 cavabsız topla məğlub edib, “Real” (İspaniya) – PSJ (Fransa) matçı 3:1, “Yuventus” (İtaliya) – “Tottenhem” (İngiltərə) görüşü 2:2 hesabı ilə başa çatıb.
Fevralın 21-də UEFA Avropa Liqasının ilk 1/8 finalçısı müəyyənləşib. 1/16 final mərhələsinin cavab oyunu çərçivəsində Serbiyanın “Srvena Zvezda” komandasını qəbul edən Rusiyanın SSKA klubu 1:0 hesablı qələbə ilə mərhələ adlayıb. Serbiyadakı ilk qarşılaşmada hesab açılmamışdı.
