Sərdar Cəlaloğlunun sənədləri hazırdır
Azərbaycan Demokrat Partiyasının sədri Sərdar Cəlaloğlu 11 aprel prezident seçkisində iştirak üçün Mərkəzi Seçki Komissiyasına müraciət edəcək. Fevralın 21-də Novator.az-a danışan Sərdar Cəlaloğlu bildirib ki, bütün hazırlıqlar görülüb və MSK-ya təqdim olunası sənədlər qaydasındadır.
Demokrat Partiyasının İdarə Heyəti Sərdar Cəlaloğlunu fevralın 20-də prezidentliyə namizəd irəli sürüb.
Sərdar Cəlaloğlu 1954-cü ildə anadan olub. Tibb Universitetini bitirib. Siyasi fəaliyyətə milli azadlıq hərəkatı dalğasında başlayıb. Demokrat Partiyasının qurucusudur. 1991-1994-cü illərdə ADP təşkilat komitəsinin sədri, 1994-1996-cı illərdə partiyanın sədri, 1996-2005-ci illərdə baş katibi, 2005-2007-ci illərdə partiya sədrinin birinci müavini olub. 2007-ci ildən yenidən partiya sədridir.
2013-cü ilin oktyabrında 5 il müddətinə prezident seçilmiş İlham Əliyevin səlahiyyət müddəti 2018-ci ilin oktyabr ayında başa çatırdı. Bu il oktyabrın 17-də növbəti prezident seçkisi keçirilməli idi. Fevralın 5-də prezident İlham Əliyevin sərəncamı ilə aprelin 11-nə növbədənkənar prezident seçkisi təyin edilib. Belə bir səlahiyyət prezidentə 2016-cı ildə konstitusiyaya edilmiş dəyişikliklə verilib. Başqa bir yenilik prezidentin səlahiyyət müddətinin 5 ildən 7 ilə artırılmasıdır.
Mərkəzi Seçki Komissiyası indiyədək 13 nəfərin prezidentliyə namizədliyinin irəli sürülməsini təsdiqləyib. İddiaçıların 6-sı müstəqil namizəddir: deputat Zahid Oruc, Tural Abbaslı, Anar Umudov, Asif Məmmədov, Elşən Həsənov, Ramazan Bəkirov.
Yeni Azərbaycan Partiyasından prezident İlham Əliyev, Sosial Demokrat Partiyasından deputat Araz Əlizadə, Bütöv Azərbaycan Xalq Cəbhəsi Partiyasından deputat Qüdrət Həsənquliyev, Milli Dirçəliş Hərəkatı Partiyasından deputat Fərəc Quliyev, Liberal Demokrat Partiyasından Fuad Əliyev, Müasir Müsavat Partiyasından Hafiz Hacıyev, “Cəbhəçilərin təşəbbüs qrupu”ndan Razi Nurullayev namizəd göstərilib.
