“Kütləvi çıxarış” cəbhə bölgəsinə baş çəkib
“Kütləvi çıxarış” kampaniyası cəbhə bölgəsində yaşayan sakinlərə xidmət göstərib. Əmlak Məsələləri Dövlət Komitəsi bildirir ki, fevralın 21-də keçirdiyi kampaniyanın ünvanı Ağdamın Qaradağlı, Əfətli, Çəmənli və Sarıcallı kəndləri olub.
220-yə yaxın sakinə qeydiyyatla bağlı xidmət göstərilib. Qaradağlı kəndindən 75 ailə, Əfətlidən 60, Çəmənlidən 50, Sarıcallıdan isə 35 ailə xidmətlərdən yararlanıb. 100-ə yaxın sakinə birbaşa yaşadıqları ərazilərdə əmlaklarına dair çıxarışlar təqdim olunub. Çıxarışlar əsasən fərdi yaşayış evlərini, pay torpaqlarını, həyətyanı torpaqları əhatə edib.
Kampaniya çərçivəsində Qarabağ müharibəsi əlillərinin, şəhid ailələrinin birbaşa evlərində qeydiyyat xidmətləri göstərilib. Onların bəzilərinə əmlaklarına dair çıxarışlar təqdim olunub, bəzilərindən ilkin hüquq müəyyənedici sənədlər qəbul edilib.
Eyni zamanda rayon sakinlərinə əmlaklarına dair ayrı-ayrı vaxtlarda müxtəlif dövlət qurumlarının verdiyi dövlət aktları, şəhadətnamələr, qeydiyyat vəsiqələri, mənzillər barədə orderlər, eləcədə kolxoz və sovxozlarda verilmiş əmrlər və digər sənədlər kütləvi qaydada çıxarışlarla əvəz olunub. Çıxarış verilməsi məqsədilə 70-ə yaxın sakindən əmlaklarına dair ilkin sənədlər toplanıb.
50 nəfərə yaxın sakinə hüquqi yardım xidmətləri də göstərilib.
