Hərraclarda valyuta satışı 26,3% azalıb
Mərkəzi Bank 2017-ci il üzrə pul siyasəti icmalı açıqlayıb. Novator.az-ın məlumatına görə, hesabatda qeyd olunur ki, 2017-ci ildə manatın xarici valyutalara nəzərən məzənnəsi tədiyyə balansı üzrə meyllərə uyğun formalaşıb: “Tədiyyə balansının yaxşılaşması, ixracın genişlənməsi və idxalın əvəz edilməsi siyasəti nəticəsində valyuta daxilolmalarının artması valyuta bazarında vəziyyəti sabitləşdirib. Bu şəraitdə həyata keçirilən makroiqtisadi siyasət tədbirləri nəticəsində manatın ABŞ dollarına qarşı məzənnəsi 4% möhkəmlənib.
2017-ci ilin ikinci rübündən manatın məzənnəsi əlavə möhkəmlənmə təzyiqləri altında olub. İl ərzində valyuta bazarının ümumi həcmi ötən illə müqayisədə azalıb. Banklar 2016-cı ildə 445,4 milyon ABŞ dolları xalis valyuta satışı həyata keçirib, 2017-ci ildə rəqəm 26,5 milyon ABŞ dollarına düşüb.
2017-ci ildə makroiqtisadi və maliyyə sabitliyinin təmin olunmasına yönəlmiş kompleks tədbirlər, makroiqtisadi dayanıqlığın təmin edilməsi istiqamətində qəbul edilmiş qərarlar məzənnə rejiminin çevikliyinin daha da artırılmasına əlverişli zəmin yaradıb. Mərkəzi Bank ümumilikdə 99 valyuta hərracı keçirib. Dövr ərzində Dövlət Neft Fondunun xarici valyuta satışları 3 milyard 597,8 milyon ABŞ dolları təşkil edib, bu da 2016-cı illə müqayisədə 26,3% azdır”.
Hazırda Mərkəzi Bank ABŞ dollarını 1,7001 manata satır. Bu kurs 2017-ci il dekabrın 13-dən qüvvədədir.
2015-ci ildə dollar 0,7844 manatdan 1,5594 manata yüksəlib. 2016-cı ildə məzənnə 1,7707 manata qalxıb. 2017-ci ildə isə dollar 7,06 qəpik ucuzlaşıb.
