Artım sərəncamları neçə nəfəri əhatə edəcək?
Əmək və Əhalinin Sosial Müdafiəsi Nazirliyi dövlət başçısı İlham Əliyevin müharibə əlillərinə, 1990-cı ilin 20 Yanvar hadisələri ilə əlaqədar əlil olmuş şəxslərə və şəhid ailələrinə verilən prezident təqaüdünün artırılması barədə sərəncamlarla bağlı açıqlama yayıb.
Açıqlamaya görə, şəhid ailəsi üçün prezident təqaüdünün artırılması sərəncamı 12556 ailəyə şamil olunacaq. Prezident təqaüdünün aylıq məbləği 2018-ci il martın 1-dən 10 faiz artırılacaq və bu artımın həyata keçirilməsi üçün dövlət büdcəsindən ilin sonunadək 2,9 milyon manat əlavə vəsait ayrılacaq.
Müharibə əlillərinə verilən prezident təqaüdünün artırılması sərəncamı 20744 nəfər müharibə əlili və onlara bərabər tutulan şəxsi əhatə edəcək. Onların 14134 nəfəri Azərbaycanın ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslər, 345 nəfəri İkinci Dünya müharibəsi əlilləri, 3363 nəfəri hərbi xidmət vəzifələrini yerinə yetirərkən əlil olanlar, 2902 nəfəri Çernobıl AES-də hərbi xidmətlə əlaqədar əlil olanlardır. Sərəncamın icrası ilə əlaqədar dövlət büdcəsindən ilin sonunadək 3 milyon manata yaxın əlavə vəsait ayrılması nəzərdə tutulur.
1990-cı ilin 20 Yanvar hadisələri ilə əlaqədar əlil olmuş şəxslərə verilən prezident təqaüdünün artırılması sərəncam 307 nəfərə şamil olunacaq. Bunun üçün dövlət büdcəsindən ilin sonunadək ayrılacaq əlavə vəsait 40,8 min manat təşkil edəcək.
