Sənayedə orta maaş 970 manata yaxınlaşıb
2017-ci ildə sənayedə çalışan muzdlu işçilərin orta siyahı sayı 194,5 min nəfər olub, onların 33,8 min nəfəri mədən, 102,7 min nəfəri emal, 26,7 min nəfəri elektrik enerjisi, qaz və buxar istehsalı, bölüşdürülməsi və təchizatı, 31,3 min nəfəri isə su təchizatı, tullantıların təmizlənməsi və emalı bölmələrində çalışıb.
Novator.az bildirir ki, Dövlət Statistika Komitəsinin hesabatına görə, ötən il sənayedə işləyənlərin orta aylıq nominal əməkhaqqı 7,6 faiz artaraq 968,8 manata çatıb. Əməkhaqqı mədən sənayesində 9,9 faiz, emal sənayesində 7,2 faiz, elektrik enerjisi, qaz və buxar istehsalı, bölüşdürülməsi və təchizatı bölməsində 6,6 faiz, su təchizatı, tullantıların təmizlənməsi və emalı bölməsində isə 1,7 faiz artıb.
Rəsmi açıqlamaya əsasən, 2018-ci il yanvarın 1-nə ölkə iqtisadiyyatında muzdla çalışan işçilərin sayı 1 milyon 521,3 min nəfər olub, onların 880,1 min nəfəri dövlət sektorunda, 641,2 min nəfəri qeyri-dövlət sektorunda fəaliyyət göstərib.
İşçilərin orta aylıq nominal əməkhaqqı 2016-cı ilə nisbətən 5,7 faiz artaraq 528,2 manata yüksəlib.
