Namizədlik yarışında artım
Mərkəzi Seçki Komissiyası 11 aprel prezident seçkisinə qatılmış daha 7 nəfərin namizədliyini təsdiqləyib. Novator.az bildirir ki, yeni iddiaçıların 3-ü Milli Məclisin deputatıdır: Araz Əlizadəni Sosial Demokrat Partiyası, Qüdrət Həsənquliyevi Bütöv Azərbaycan Xalq Cəbhəsi Partiyası, Fərəc Quliyevi Milli Dirçəliş Hərəkatı Partiyası namizəd irəli sürüb.
Digər yeni iddiaçılar Müasir Müsavat Partiyasından Hafiz Hacıyev, “Cəbhəçilərin təşəbbüs qrupu”ndan Razi Nurullayev, müstəqil namizədlər Asif Məmmədov və Elşən Həsənovdur.
Daha əvvəl 5 nəfərin namizədliyi təsdiqlənmişdi. Onların 2-si partiya namizədi, 3-ü müstəqil iddiaçıdır.
Hakim Yeni Azərbaycan Partiyasının namizədi prezident İlham Əliyev, Azərbaycan Liberal Demokrat Partiyasının namizədi bu qurumun sədri Fuad Əliyevdir.
Müstəqil namizədlərdən biri Milli Məclisin deputatıdır: Zahid Oruc. Tural Abbaslı Ağ Partiyanın başqanı, Anar Umudov hüquqşünasdır.
Prezidentliyə namizədin müdafiəsi üçün 40 mindən az olmayan sayda seçici imzası toplanmalıdır. 60-dan az olmayan seçki dairəsinin hər birinin ərazisindən azı 50 imza yığmaq tələb edilir. Bir seçici yalnız bir namizədin müdafiəsi üçün imza ata bilər.
2013-cü ilin oktyabrında 5 il müddətinə prezident seçilmiş İlham Əliyevin səlahiyyət müddəti 2018-ci ilin oktyabr ayında başa çatırdı. Bu il oktyabrın 17-də növbəti prezident seçkisi keçirilməli idi.
Fevralın 5-də prezident İlham Əliyevin sərəncamı ilə aprelin 11-nə növbədənkənar prezident seçkisi təyin edilib. Belə bir səlahiyyət prezidentə 2016-cı ildə konstitusiyaya edilmiş dəyişikliklə verilib. Başqa bir yenilik prezidentin səlahiyyət müddətinin 5 ildən 7 ilə artırılmasıdır.
