Komitənin əsasnaməsi yeniləndi
Prezident İlham Əliyev Dini Qurumlarla İş üzrə Dövlət Komitəsinin əsasnaməsini “Dini etiqad azadlığı haqqında” qanunda dəyişikliklərə uyğunlaşdıran fərman imzalayıb. Əsasnamədə yeniliyə görə, komitə dini mərkəzin vətəndaşları təhsil üçün xarici ölkələrin dini tədris müəssisələrinə göndərməsinə, dini tədris müəssisələri tələbələrinin və müəllimlərinin, habelə din xadimlərinin və mütəxəssislərinin mübadiləsinə razılıq verəcək.
Qafqaz Müsəlmanları İdarəsinin müraciəti əsasında xaricdə dini təhsil almış Azərbaycan vətəndaşlarının islam dininə aid ayin və mərasimlərin aparılmasına buraxılması üçün razılıq verilməsi də komitənin səlahiyyətində olacaq.
“Dini etiqad azadlığı haqqında” qanuna dəyişiklik ötən ilin iyun ayında qüvvəyə minib. Novator.az bildirir ki, yeniliyə əsasən, Qafqaz Müsəlmanları İdarəsi xaricdə dini təhsil almış Azərbaycan vətəndaşlarına islam dininə aid ayin və mərasimlər aparmaq icazəsi verir. Bu icazə Dini Qurumlarla İş üzrə Dövlət Komitəsi ilə razılaşdırılmalıdır.
Qafqaz Müsəlmanları İdarəsinin dəvət etdiyi din xadimləri istisna olmaqla əcnəbilər və vətəndaşlığı olmayan şəxslərin dini təbliğat aparması qadağandır.
Vətəndaşların təhsil almaq üçün xarici ölkələrin dini tədris müəssisələrinə göndərilməsini, dini tədris müəssisələri tələbələrinin və müəllimlərinin, habelə din xadimlərinin və mütəxəssislərinin mübadiləsini Dini Qurumlarla İş üzrə Dövlət Komitəsi ilə razılaşdırmaqla Qafqaz Müsəlmanları İdarəsi həyata keçirir.
