Xüsusi təyinatlı təhsil müəssisələrinə qəbul qaydaları
Müdafiə Nazirliyi hərbi qulluqçu hazırlayan xüsusi təyinatlı təhsil müəssisələrinə qəbul qaydalarını açıqlayıb.
Heydər Əliyev adına Azərbaycan Ali Hərbi Məktəbində tədris Azərbaycan dilində aparılır. Təhsil forması əyani, müddət 4 ildir.
Cari il mülki ümumtəhsil müəssisələrinin tam orta təhsil səviyyəsini bitirmiş, 15 sentyabr 2018-ci ilə qədər 17 yaşı tamam olan və 19 yaşı tamam olmayan kişi cinsli Azərbaycan vətəndaşları qəbul edilirlər.
Heydər Əliyev adına Azərbaycan Ali Hərbi Məktəbinin məzunlarına hərbi ixtisaslarla yanaşı müvafiq mülki ixtisas üzrə bakalavr dərəcəsi də verilir.
Azərbaycan Tibb Universitetinin hərbi tibb fakültəsində hərbi həkim işi ixtisası üzrə tədris Azərbaycan dilindədir. Təhsil forması əyani, müddət 6 ildir.
Cari ildə mülki ümumtəhsil müəssisələrinin tam orta təhsil səviyyəsini bitirmiş, 15 sentyabr 2018-ci ilə qədər 16 yaşı tamam olan və 19 yaşı tamam olmayan kişi cinsli Azərbaycan vətəndaşları qəbul edilirlər.
Hərbi feldşer işi ixtisası üzrə tədris Azərbaycan dilində aparılır, təhsil forması əyani, müddəti 2 ildir.
Cari ildə mülki ümumtəhsil müəssisələrinin tam orta təhsil səviyyəsini bitirmiş, 15 sentyabr 2018-ci ilə qədər 17 yaşı tamam olan və 19 yaşı tamam olmayan, habelə müddətli həqiqi hərbi xidmət keçmiş 23 yaşına qədər hərbi vəzifəli Azərbaycan Respublikasının kişi cinsli vətəndaşları qəbul edilirlər.
