Sərhədin yanvar gündəliyi
Dövlət Sərhəd Xidməti 2018-ci ilin yanvar ayının hesabatını yayıb. Rəsmi məlumata görə, ay ərzində dövlət sərhədini pozan 45 nəfər tutulub. Onların 12-si Azərbaycan, 13-ü Özbəkistan, 6-sı Gürcüstan, 3-ü Pakistan, 2-si İran, 2-si Mərakeş, qalanları Rusiya, Tacikistan, Konqo, İraq, İordaniya, Şri-Lanka, Türkiyə vətəndaşıdır.
Sərhəd rejim pozucusu qismində 29 nəfər saxlanıb.
Dövlət sərhədindən keçid məntəqələrində rejim qaydalarını pozduqlarına görə, o cümlədən ölkədən çıxışı qadağan olunduğuna görə 1145, ölkəyə girişi qadağan olunduğuna görə 93, vizası olmadığına görə 202, vizasının və pasportunun müddəti bitdiyinə görə 130, müvafiq sənədi olmadığına görə 64, ölkədə müddətdən artıq qaldığına görə 90, etibarnaməsi olmadığına görə 142 nəfər dövlət sərhədindən buraxılmayıb.
Azərbaycan hüquq mühafizə orqanlarının axtarışında olan 375 nəfər aşkarlanaraq aidiyyəti orqanlara təhvil verilib.
17 kiloqram 913 qram narkotik maddə, 2269 ədəd psixotrop dərman aşkar edilərək götürülüb.
Ümumi dəyəri təqribən 1 milyon 246 min 309 min manat olan qaçaqmalın dövlət sərhədindən qanunsuz keçirilməsinin qarşısı alınıb.
