“Liverpul” məsələni ilk oyunda çürütdü
UEFA Çempionlar Liqasının 1/8 finalında daha iki oyun keçirilib. Novator.az-ın məlumatına görə, fevralın 14-ü Portuqaliya səfərində “Portu” ilə üz-üzə gələn “Liverpul” (İngiltərə) rəqibinə aman verməyib – 5:0.
“Real” (İspaniya) – PSJ (Fransa) matçı 3:1 hesabı ilə bitib.
Çərşənbə axşamı İsveçrədə “Bazel”in qonağı olan “Mançester Siti” (İngiltərə) rəqibini 4 cavabsız topla məğlub etmiş, “Yuventus” (İtaliya) – “Tottenhem” (İngiltərə) görüşü 2:2 hesabı ilə başa çatmışdı.
Digər cütlüklər gələn həftə meydanlara çıxır:
“Sevilya” (İspaniya) – “Mançester Yunayted” (İngiltərə)
“Şaxtyor” (Ukrayna) – “Roma” (İtaliya)
“Çelsi” (İngiltərə) – “Barselona” (İspaniya)
“Bavariya” (Almaniya) – “Beşiktaş” (Türkiyə).
2017-2018 mövsümündə Çempionlar Liqasının 1/8 finalına çıxan komandaların tən yarısı əvvəllər bu turniri zirvədə başa vurub. İndiki 16-lıqda titul sarıdan Madridin “Real” klubu şəksiz liderdir. Komanda 12 dəfə Çempionlar Liqasının qalibi olub.
1955-ci ildə yaradılmış, 1991-1992 mövsümünədək Çempionlar kuboku adlanmış turnirdə “Bavariya”, “Barselona”, “Liverpul” 5 zəfər əldə ediblər.
İndiki 1/8 finalçılardan “Mançester Yunayted”in 3, “Yuventus”un və “Portu”nun 2, “Çelsi”nin 1 titulu var.
Digər 8 komanda – “Tottenhem”, “Mançester Siti”, “Bazel”, “Sevilya”, PSJ, “Şaxtyor”, “Roma”, “Beşiktaş” heç vaxt Çempionlar Liqasının qalibi olmayıblar.
