Hər 100 doğulan qıza 114 oğlan düşüb
Azərbaycan əhalisinin sayı 2018-ci il yanvarın 1-nə 9 milyon 898 min 85 nəfərə çatıb. Novator.az-ın məlumatına görə, Dövlət Statistika Komitəsi bildirir ki, əhalinin 49,9 faizi kişi, 50,1 faizi qadındır.
2017-ci ildə Ədliyyə Nazirliyinin qeydiyyat şöbələri 144 min 41 nəfər doğulmuş körpə qeydə alıb. Yeni doğulanlar arasında qızların xüsusi çəkisi 46,8 faiz təşkil edib, hər 100 doğulan qıza 114 oğlan düşüb (bioloji norma 105-107-dir). Doğulanların cins nisbətinin pozulması ümumi əhalinin cins strukturuna da təsir göstərib və hər 1000 kişiyə 1004 qadın düşüb.
Ötən il ölkədə 57 min 109 ölüm halı qeydə alınıb.
62 min 923 nikah və 14 min 514 boşanma rəsmiləşib.
2017-ci ildə Daxili İşlər Nazirliyi və Dövlət Miqrasiya Xidmətinin müvafiq qurumları daimi yaşamaq üçün Azərbaycana 3073 nəfər gələn və 1901 nəfər ölkədən gedən qeydə alıb, miqrasiya saldosu müsbət 1172 nəfər təşkil edib.
