DSMF-də 3 milyon 585 min 515 nəfər qeydiyyata alınıb
Bu ilin yanvar ayında Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun fərdi uçot sistemində 18770 nəfərə fərdi şəxsi hesab açılıb. Rəsmi hesabata görə, 1 fevral 2018-ci ilə fondun fərdi uçot sistemində qeydiyyata alınan sığortaolunanların sayı 3 milyon 585 min 515 nəfərə çatıb.
Fərdi uçot sistemi 2006-cı ildə qurulub, sığorta-pensiya sisteminin tərkib hissəsidir. Fərdi hesabların sığorta hissəsində qeydə alınmış pensiya kapitalı məbləğləri hər il indeksləşdirilir. Bu il yanvarın 1-dən fərdi uçot sistemindəki fərdi hesabların sığorta hissəsində qeydə alınmış pensiya kapitalı məbləğləri 2017-ci ilin orta aylıq nominal əməkhaqqının artım tempinə uyğun olaraq 5,7 faiz artırılıb.
1 yanvar 2018-ci ilə ölkədə 1 milyon 318 min 434 nəfər əmək pensiyası alır. Əmək pensiyalarının indeksləşdirilərək artırılması pensiyaçıların 1 milyon 236 min nəfərinə və ya 94 faizinə şamil olunacaq.
