Qeyri-neft ixracı 22 faizdən çox artıb
2017-ci ildə Azərbaycanın hüquqi və fiziki şəxsləri dünyanın 187 ölkəsindəki tərəfdaşları ilə ticarət əməliyyatları həyata keçirib, 116 ölkəyə məhsul ixrac olunub, 179 ölkədən məhsul alınıb.
Novator.az-ın məlumatına görə, Dövlət Statistika Komitəsi bildirir ki, xarici ticarət dövriyyəsi 24 milyard 257,6 milyon ABŞ dolları, o cümlədən ixracın dəyəri 15 milyard 475,6 milyon dollar, idxalın dəyəri 8 milyard 782 milyon dollar təşkil edib, 6 milyard 693,6 milyon dollarlıq müsbət ticarət saldosu yaranıb.
2016-cı illə müqayisədə xarici ticarət dövriyyəsi faktiki qiymətlərlə 12,3 faiz artıb, real ifadədə isə 10,7 faiz, o cümlədən ixrac 7,1 faiz, idxal 16,1 faiz azalıb.
2017-ci ildə 1 milyard 538,4 milyon dollar dəyərində qeyri-neft məhsulları ixrac edilib, bu da 2016-cı ilə nisbətən faktiki qiymətlərlə 24,4 faiz, real ifadədə isə 22,2 faiz çoxdur.
Başqa bir hesabata görə, 2017-ci ildə Avropa-Qafqaz-Asiya nəqliyyat dəhlizinin Azərbaycan hissəsində daşınmış yüklərin həcmi 4,8 faiz artıb.
Dövlət Statistika Komitəsi həmçinin bildirir ki, 2017-ci ildə tikinti sahəsində çalışan muzdlu işçilərin orta siyahı sayı 102,7 min nəfər təşkil edib. Tikinti sahəsində işləyənlərin orta aylıq nominal əməkhaqqı əvvəlki ilə nisbətən 4,1 faiz azalaraq 780,7 manat olub.
