Parlamentdə bələdiyyə hesabatı
Fevral 13-ü Milli Məclisin iclasında Bələdiyyələrlə İş Mərkəzinin illik məruzəsi dinlənib. Məruzəni təqdim edən ədliyyə nazirinin müavini Vilayət Zahirov deyib ki, 2017-ci ildə inzibati nəzarət qaydasında baxılması üçün Ədliyyə Nazirliyinə 62 min 618 bələdiyyə aktı daxil olub: “60 min 444 akt qanunvericiliyə uyğun hesab edilib. Qanunvericiliyin tələblərinə uyğun olmayan 1978 aktın isə dəyişdirilməsi və ya ləğv edilməsi üçün onları qəbul etmiş bələdiyyələrə müraciət olunub. Nazirliyin təkliflərinin əsasında onlardan 740-ı ləğv edilib, 714-ü dəyişdirilib, digərləri isə baxılmaqdadır”.
Hesabata görə, bələdiyyə aktlarının hüquqi ekspertizası nəticəsində 1883 hektar torpaq sahəsinin icarəyə, 576 hektar torpaq sahəsinin istifadəyə, 175 hektar torpaq sahəsinin qanunsuz olaraq ayrı-ayrı şəxslərin mülkiyyətinə verilməsi müəyyən edilib və həmin qərarlar verilmiş təkliflər əsasında ləğv olunub: “Bütövlükdə 2636 hektar torpaq sahəsinin qanunsuz verilməsinin qarşısı alınıb”.
Xəbəri AZƏRTAC yayıb.
