Mir Cəlal küçəsi yenidən qurulur
Azərbaycan Avtomobil Yolları Dövlət Agentliyi Bakının Mir Cəlal küçəsinin əsaslı təmiri ilə bağlı açıqlama yayıb.
Rəsmi məlumata görə, əsaslı şəkildə yenidən qurulan küçənin uzunluğu 1,75 kilometr, eni isə 22 metrdir. 4 hərəkət zolaqlı küçə boyu 2 metr enində ayrıcı zolağın ləğv edilməsi ilə küçənin eni 24 metrə qədər genişləndiriləcək. Ayrıcı zolaqda yerləşən yüksək gərginlikli elektrik xətləri yolun altına köçürülür. Yüksək gərginlikli elektrik xətləri xüsusi dördbucaqlı beton boruların içi ilə çəkilir. Artıq bu işlər yolun təqribən 400 metrlik hissəsində görülərək yekunlaşdırılıb.
Təmir-tikinti layihəsinə uyğun olaraq küçə boyu mövcud köhnə yağış-kanalizasiya sistemi bərpa olunaraq işlək vəziyyətə salınacaq, zəruri yerlərdə yeni sistem qurulacaq, 53 ədəd yeni yağış barmaqlıqları və 160 ədəd kommunikasiya xətlərinin baxış qapaqları qoyulacaq. 6 yerdə isə avtobusların ümumi hərəkətə mane olmamaları üçün dayanacaqlarının önündə xüsusi “cib”li hissələr yaradılacaq.
9 min kvadratmetr mövcud piyada səkiləri bərpa olunur, kənarlarında olan köhnə səki daşları sökülərək yeniləri ilə əvəzlənir.
Küçə boyu 2 laydan ibarət yeni asfalt-beton örtüyü döşənəndən sonra Mir Cəlal küçəsi vətəndaşların istifadəsinə veriləcək.
