Dollar iki ayı bir nöqtədə tamamladı
Fevralın 13-də bir çox valyuta bahalaşıb. Novator.az-ın məlumatına görə, avro 2,0919 manata, Rusiya rublu 0,0294 manata, türk lirəsi 0,4478 manata yüksəlib.
Dəyər itirən gürcü larisi banklara 0,6953 manata, ingilis funt sterlinqi 2,3544 manata satılır.
Mərkəzi Bank ABŞ dollarının kursunu 1,7001 manat səviyyəsində saxlayıb. Bununla sabitlik iki aya çatıb. Dollar 2017-ci il dekabrın 13-dən 1,7001 manata təklif olunur. Bu, manatın devalvasiyaya uğradığı 2015-ci ildən bəri ən davamlı rəsmi məzənnədir.
2015-ci ildə dollar 0,7844 manatdan 1,5594 manata yüksəlib. 2016-cı ildə məzənnə 1,7707 manata qalxıb. 2017-ci ildə isə dollar 7,06 qəpik ucuzlaşıb.
Mərkəzi Bankın İdarə Heyəti fevralın 12-də uçot dərəcəsini 15%-dən 13%-ə endirib. Bildirilib ki, faiz dəhlizinin parametrləri haqda qərar faktiki orta illik inflyasiyanın birrəqəmli trayektoriyaya daxil olması, inflyasiyanın azalmasına dair proqnozlar və xarici balansın yaxşılaşması nəzərə alınmaqla qəbul edilib.
Uçot dərəcəsi Mərkəzi Bankın kommersiya banklarına verdiyi borclar üzrə faiz dərəcəsidir. 2016-cı ildə uçot dərəcəsi 3%-dən 15%-ə qalxmışdı.
